Отам

Отам дарё эди, 

Каттакон дарё,

Менинг тушларимда айқириб оққан.

Бу ёлғиз дарёга суянган дунё

Ўтли кўзларимга оқариб боққан.

Ў, дарё отам-а, изингиз қайда,

Тушлардин ҳам айро ўзингиз қайда?

Отам чинор эди, 

Каттакон чинор,

Япроқлар ўрнида мевалар битган.

Сўлим соялари умримга хумор,

Қуёшдан олтинранг ипаклар тутган.

Ў, чинор отам-а, изингиз қайда,

Тоғлардан виқорли ўзингиз қайда?

Агар санайверсам

Буюклик тимсол.

Йўқ, фақат ўзига ўхшаган отам.

Бир ҳовли қошига дарвоза инсон,

Бир ўғил суянса, суямиш Ватан.

Ў, етти ёшимга армон отам-а,

Макони Ерми ё Осмон отам-а?!.